有貓之家

縱橫古今─老爸

嬰兒兮時代，佇媽媽 兮腹肚內，媽媽著是我兮世界，咱兩人無熟識，聽講你定定甲我講話，講欲做放送頭，報好消息乎我知，講我後日阿哪出世，一定會目識巧、伶俐古錐人人愛！

細漢兮時陣，我是你兮好朋友，甲你講話、聽你唱歌、做你兮酒伴，你講我是你兮消氣丸，我上了解你，對你上好，你講兮話，我攏有咧聽，轉來厝裡，哪是看著我，什麼艱苦嘛母驚。

〈我亦未學講話，你甲我開講，我只好惦惦聽，你飲燒酒，著叫我甲你乾杯，，你哪飲酒醉，無人甲我飼牛奶，敢知影我是腹肚餓擱嘴乾？〉

大漢去讀冊，你無叫我愛讀第一名、嘛無交代放學緊轉來，干哪煩惱我瘦擱薄板，這呢軟弱欲按怎；考試紙分轉來，提乎你看，你講嘟好及格著好，加考那麼〈ㄏ一ㄚ呢〉濟分，沾〈ㄨㄣˋ〉豆油敢也當食；甲你講學校欲去遠足，愛家己紮便當，你惦惦無愛應我，越頭甲媽媽講：青食都無夠啊，哪有通好曝干？

〈別人讀冊攏有人載，干哪我要家己行；別人成績好 有獎勵，干那我愛聽你五四三；別人紮好食物去遠足，干哪我佇厝內失望、流嘴瀾！〉

畢業了後去食頭路，路途遠住佇外口，你嘛真少來甲我看，聽講甲〈加口〉飯兮時，你不時吐大季〈加口〉：講我無佇厝，攏無人知影你食幾碗，放假轉來，聽我甲媽媽咧講話，你攏惦惦無出聲，真奇怪！你哪也知影我當時欲出門？喔多賣〈機車〉早著牽去巷仔口，等欲載我去坐車‧………….

〈你攏母知我出外兮艱苦，無問我敢也想厝？敢有乎人欺負？做工課敢也粗重？佇生份兮所在，我兮環境，是有好人亦是壞人？〉

結婚以後，轉去外家,，你仝款真少講話；仝款算好時間牽『喔多賣』，去巷阿口等我坐；但是我知影：親像按呢坐你兮車、乎你載，是愈來愈無機會。

有一工，你哪老，我一定會好好阿甲你開講：講我亦祙出世，你著對我講出心內話，講我兮艱苦你攏了解，只是關心佇心底；講你載我一世人，著是帶我去遠足、是對我上好兮獎勵；講你是我兮好朋友、咱兩人要好好阿來乾杯‧……..

〈但是啊！你哪也這呢早走，咱做夥時間那也這呢短？〉

我亦未甲你講：你、永遠、是我上愛兮『老爸』